ଢୁମ୍ପା ସଙ୍ଗୀତ

ତୋ ଚାରୁ ଚାହାଣୀ ଚାହିଁ

ମରି ତୁ ଆବୁର ସାରି ପକା ପଛେ

ମୋ ନିଆଳୀ

ମୋ ଦେହ ତ ସହୁ ନାହିଁ

। ୧ ।

ଦିଅ ଯେତେ ଇଚ୍ଛା ଦଣ୍ଡ

ଝୁମି କାମ ସଙ୍ଗେ ଝୁଣି ଦେବି ସିନା

ମୋ ନିଆଳୀ

ଝଳି ଝଲମଲ ଗଣ୍ଡ

। ୨ ।

ହେବୁଟି କି ଶିରଗଭା

କାଳ ସହୁନାହିଁ ବାଳମୃଗଦୃଶା

ମୋ ନିଆଳୀ

ନୂଆ ବିକଶିତ ଶୋଭା

। ୩ ।

ତୋହ ପରି ତୁହି ସିନା

ବିଜେ କଲା ପୁରେ ପୁରି ରହିଥାଏ

ମୋ ନିଆଳୀ

ବନଜ-ବନ-ବାସନା

। ୪ ।

ଅଛି ଯେବେ ଅନୁକମ୍ପା

କାତି ଝିଙ୍କି ପଛେ ଛାତିରେ ପ୍ରହାର

ମୋ ନିଆଳୀ

ହୀରା ବୁଲାକି ନ କମ୍ପା

। ୫ ।

ପାସୋର ବାସର ଲାଜ

ପଛକୁ ପକାଇ ନ ଦେଲେ ନ ଚଳେ

ମୋ ନିଆଳୀ

ବିଧି ନିଷେଧକୁ ଆଜ

। ୬ ।

ତୋ କୁଚ ତ କରକଶ

ସବୁ ଗୁମାନ ଆଉ କେତେବେଳକୁ

ମୋ ନିଆଳୀ

ଥରେ ମୋହ କରେ କଷ

। ୭ ।

ଚୁମ୍ବନେ କଲେ ଶରଧା

ଚରଣଠାରୁ କବରୀଯାଏ ତୋର

ମୋ ନିଆଳୀ

କାହିଁ ପୂରି ନାହିଁ ସୁଧା

। ୮ ।

ଚତୁରଦଶ ଭୁବନେ

ରସବତୀ ଚକ୍ର ଚୂଡ଼ାମଣି ବୋଲି

ମୋ ନିଆଳୀ

ତୋ ବିନେ ଆନେ ନ ମାନେ

। ୯ ।

କାହିଁକି ଚାଲୁ ତୁ ତଳେ

ଘାଣ୍ଟି ହେଉଅଛି କଣ୍ଟୀରବମଧ୍ୟା

ମୋ ନିଆଳୀ

ମୋ ମନଯାକ ବିକଳେ

। ୧୦ ।

ଆନ ନାହିଁ ତୋହ ବିନା

ଅଷ୍ଟଦୁର୍ଗଧରାବର ଆରେ ଧୀରା

ମୋ ନିଆଳୀ

ତୋହର ଅଧୀନ ସିନା

। ୧୧ ।

କରୀଗତି ଚାନ୍ଦମୁହିଁ

କରି ଗତି ରସେ ରଜନୀ ପୁହାଏ

ଜାଈଫୁଲ ରେ

ତୋ ରୂପ ଲାବଣ୍ୟ ଚାହିଁ

। ୧ ।

ଖରପରଶୁମୋହନା

ଖଣ୍ଡପରସା ବଚନକୁ କହ

ଜାଈଫୁଲ ରେ

ଖଣ୍ଡ ହୃଦୟ ବେଦନା

। ୨ ।

ଗିରୀଷମ କାଳେ ଧନ

ଗିରିସମ କୁଚେ ଲେପି ଚନ୍ଦନ

ଜାଈଫୁଲ ରେ

କରୁଥାଉ ଆଲିଙ୍ଗନ

। ୩ ।

ଘନସାର ମୋ ହୃଦକୁ

ଘନସାରକେଶୀ ଝାଡ଼ି ଦେଇ କରି

ଜାଈଫୁଲ ରେ

ଗାଢ଼େ ଆଲିଙ୍ଗନ କରୁ

। ୪ ।

ନାଗରମଣିକି ତତେ

ନାଗମଣିକୁମ୍ଭସ୍ତନା ସମାନ ରେ

ଜାଈଫୁଲ ରେ

ଓଇବେ ନୋହେ ପରତେ

। ୫ ।

ଚନ୍ଦ୍ରମୁହୀଁ ପ୍ରାଣଧନ

ଚନ୍ଦ୍ର ମୁହଁ ଚାଳି ରତି କଲା କାଳେ

ଜାଈଫୁଲ ରେ

ଶୀତ୍କାରେ ଭଜୁ ଅଜ୍ଞାନ

। ୬ ।

ଛାଇ ବିପରୀତ ମୋର

ଛାଇଟି ପରାଏ ଦେହକୁ ନ ଛାଡ଼େ

ଜାଈଫୁଲ ରେ

ସେରୂପେ ଥିବି ପାଶର

। ୭ ।

ଜାତୀକରଜା ସୁକେଶୀ

ଜାତିକର ଦିବ୍ୟହୀରକ ସୁଦନ୍ତୀ

ଜାଈଫୁଲ ରେ

ଚନ୍ଦ୍ରଚନ୍ଦ୍ରମା ସୁହାସୀ

। ୮ ।

ଝଳି ସୁନାଅଙ୍ଗୀ ରତେ

ଝଳି ସୁନା ପରି ଗାଢ଼େ ଭିଡ଼ି କରି

ଜାଈଫୁଲ ରେ

ନ ଦେଉ କି ସୁଖ ମୋତେ

। ୯ ।

ନିଶାରେ ସିତକରଜା

ନିଶାରେ ଶୀତରେ ଆଦର ନ କରି

ଜାଈଫୁଲ ରେ

ଅଙ୍ଗସଙ୍ଗେ ଦେଉ ମଜା

। ୧୦ ।

ଟିକାଏ ବିକଳ ନୋହି

ଟୀକା ଏବେ କାମରଜାର ଭାଙ୍ଗିବ

ଜାଈଫୁଲ ରେ

ତୋ ସାହାରେ ପ୍ରାଣସହି

। ୧୧ ।

ଠଉରିବି ନାହିଁ ବୋଲି

ଠଉରି ବିରାଗ ପାଇଣ ମଦନ

ଜାଈଫୁଲ ରେ

ପଳାଏ ରତେ ଛଇଳି

। ୧୨ ।

ଡାକି କରିଗତି ତୋତେ

ଡାକି କରିଅଛି ଡାକମଝା ସରି

ଜାଈଫୁଲ ରେ

ନୁହଇ ମୁଁ କଦାଚିତେ

। ୧୩ ।

ଢାଳି ସୁଧାକର ମୁଖ

ଢାଳି ସୁଧା କି ଭଙ୍ଗୀରେ ଚାହୁଁ ଥାଉ

ଜାଈଫୁଲ ରେ

ଉପୁଜାଇ କେତେ ସୁଖ

। ୧୪ ।

ଅବଧରି ତୋ ଆଜ୍ଞାକୁ

ଅବଧ ରିପୁ କାମକୁ ଦଣ୍ଡ ଦେବି

ଜାଈଫୁଲ ରେ

ସେବାରେ ଘେନି ମନକୁ

। ୧୫ ।

ତାରତମ କଲେ ସହି

ତାରତ ମଧ୍ୟରେ କଳଙ୍କ ମୁଖକୁ

ଜାଈଫୁଲ ରେ

ଇନ୍ଦ୍ରସମ ହେବ କେହି

। ୧୬ ।

ଥର ଥରକେ ମୋ ଅଙ୍ଗ

ଥରଥର ହୁଏ କାମଶରଘାତେ

ଜାଈଫୁଲ ରେ

ଋତୁରେ ନ ପାଏ ସଙ୍ଗ

। ୧୭ ।

ଦରଶନକମୋହିନୀ

ଦରଶନ ବିନା ତୋହର କାମକୁ

ଜାଈଫୁଲ ରେ

ନୋହିଲେ ଥାଏ ନ ମାନି

। ୧୮ ।

ଧରମ ନ କରି ନିକି

ଧର ମନରେ ପାଇଛି ମୁହିଁ ହେମ

ଜାଈଫୁଲ ରେ

ଚମ୍ପକସୁବରନୀକି

। ୧୯ ।

ନରବର-ସୁତା ଘେନ

ନରବରଜେ ସମାନ ସତେ ନାହିଁ

ଜାଈଫୁଲ ରେ

ପାଇ ତୋ ପ୍ରେମରତନ

। ୨୦ ।

ପରମଦାବଚ ସହି

ପରମ ଦାରୁଣ ଫୁଲଧନୁ ପାଦେ

ଜାଈଫୁଲ ରେ

ଅନୁସରି ଅଛି ମୁହିଁ

। ୨୧ ।

ଫୁଲୁଥାଏ ଯେବେ ନାସା

ଫୁଲୁଥାଏ କାମ ମନ ସାହା ପାଇ

ଜାଈଫୁଲ ରେ

କରିଣ ତୋତେ ଭରସା

। ୨୨ ।

ବରଷ ଶହେ ତପରେ

ବଚ ସଂଶୟେ ଛାଡ଼ି ପୂର୍ବେ ପାଇଛି

ଜାଈଫୁଲ ରେ

ଶିବଙ୍କୁ ମନାଇ ବାରେ

। ୨୩ ।

ଭାରତୀକି ଶୁଣି ତୋର

ଭାରତୀ କି ପାଞ୍ଚି ବୀଣା ଫିଙ୍ଗି ଦେବେ

ଜାଈଫୁଲ ରେ

ଲଜ୍ଜାରେ ହୋଇ କାତର

। ୨୪ ।

ମନମଥ ନାମ ଯାର

ମନମଥନୀ ଅଟୁ ତୁ ତାହାର

ଜାଈଫୁଲ ରେ

ଶଶିହାସୀ ରାମାବର

। ୨୫ ।

ଜୀବନଜବଦାନକୁ

ଜୀବନ ଯତନେ ବିକି ଦେଇଅଛି

ଜାଈଫୁଲ ରେ

କି ଡର କାମ ଛାରକୁ

। ୨୬ ।

ରତିକର ତୁଳା ତୋର

ରତି କରକରଦନା ଊଣାହେବ

ଜାଈଫୁଲ ରେ

ସମ କେ ଅଛି ସଂସାରେ

। ୨୭ ।

ଲକ୍ଷ ଦେବୀ ସେବା କରି

ଲକ୍ଷ୍ୟ ଦେବି ତୋତେ ବିଚାରି କବିଏ

ଜାଈଫୁଲ ରେ

ନ ପାଇଲେ ତିନି ପୁରୀ

। ୨୮ ।

ବଳିଆଇ କହ ଧନ

ବଳିଆଇ ଶୂର ରଖି ଜୀବନରେ

ଜାଈଫୁଲ ରେ

ତୋ ଅଧର ସୁଧାପାନ

। ୨୯ ।

ସାରସଗତି ମହିଳା

ସାରସଙ୍ଗତ ପାଇ ମୁହିଁ ନିରତେ

ଜାଈଫୁଲ ରେ

ଭାବେ ହେଉଥାଏ ଭୋଳା

। ୩୦ ।

ସୁବରନକୁ ତୋହର

ସୁବରନ ସରି ନୋହିଣ ଅନଳେ

ଜାଈଫୁଲ ରେ

ଦହୁଅଛି ତା ଶରୀର

। ୩୧ ।

ସୁରମଣୀ ପାଶେ ଥିଲେ

ସୁରମଣି ପଦ ବଳାତ୍କାରେ ମୋର

ଜାଈଫୁଲ ରେ

ପଡ଼ିଥାଏ ପାଦ ତଳେ

। ୩୨ ।

ହରବର ପାଇ କେତେ

ହର ବର ପାଇ ପାଇଲି ତତେ

ଜାଈଫୁଲ ରେ

ନ ଥିଲା ମନ ପରତେ

। ୩୩ ।

କ୍ଷିତି ପହଞ୍ଚିବା ଭାବ

କ୍ଷିତିପ ହରିଚନ୍ଦନ କହେ ତତେ

ଜାଈଫୁଲ ରେ

ଦେଖି ଦିବକୁ ତେଜିବ

। ୩୪ ।